تہران۔23مئی (اے پی پی) وزیراعظم محمد شہباز شریف ایران دے دورہ اچ مرحوم ایرانی صدر ڈاکٹر سید ابراہیم رئیسی اتے انہاں دے رفقا بارے تھیوݨ آلی تعزیتی تقریب اچ تاجکستان دے صدر امام علی رحمان سودھے عالمی رہنماواں نال ملاقاتاں کیتی۔ وزیر اعظم آفس دے میڈیا ونگ توں جاری بیان موجب بدھ کوں وزیر اعظم محمد شہباز شریف ایران دے صدر ڈاکٹر سید ابراہیم رئیسی اتے وزیر خارجہ سودھے ہیلی کاپٹر حادثے دے شہیداں دی تعزیت کیتے ایران دے ہک ݙینھ دے دورے تے ڳئے۔ ایں موقع تے وزیر اعظم دی تاجکستان دے صدر امام علی رحمان نال ملاقات تھئی۔ ملاقات اچ ݙوپاسہ تعلقات کوں ٻٰا مستحکم ٻݨاوݨ اتے آپسی دلچسپی دے معاملیاں تے ڳالھ کیتی ڳئی۔ وزیراعظم نال آذربائیجان دے وزیر اعظم علی اسدوو وی ملاقتا کیتی۔ وزیر اعظم اتے قطر دے امیر شیخ تمیم بن حمد آل ثانی وچال وی ملاقات تھئی۔ وزیر اعظم ترکیہ دے نائب صدر جودت یلماز اتے ترکیہ دے وزیر خارجہ ہاکان فیدان نال انڄ انڄ ملاقاتاں وی کیتی۔ وزیراعظم ایران دے سپریم لیڈر دی تعینات کردہ انتظامی اسمبلی ’’مجمع تشخیص مصلحت نظام‘‘ دے رکن احمدی نژاد نال وی ملاقات کیتی۔
