گڏيل قومون-26 اپريل (اي پي پي) گڏيل قومن سوڊان ۾ خوراڪ، پاڻي، دوائن ۽ ٻارڻ جي کوٽ بابت خبردار ڪري ڇڏيو آهي. سعودي ميڊيا ذريعن موجب گڏيل قومن جي ماتحت پناهگيرن جي هاءِ ڪمشنر جي ترجمان چيو آهي ته 20 هزار سوڊاني ملڪ ڇڏي چاڊ هليا ويا آهن جڏهن ته ڏکڻ سودان کان تقريبن 4 هزار پناهگير پنهنجي وطن واپس آيا آهن. هاءِ ڪمشنر جي ترجمان جنيوا ۾ تفصيل ٻڌائيندي چيو ته ايئن لڳي ٿو ته جنگ جي نتيجي ۾ اندروني ۽ ٻاهرين ملڪ لڏپلاڻ ڪندڙن جي تعداد ۾ اضافو ٿيندو. ٻئي طرف گڏيل قومن جي انساني معاملن واري رابطا آفيس جي ترجمان ڌيان ڇڪرايو آهي ته خوراڪ، پاڻي، دوائن، ٻارڻ، بجلي ۽ رابطي ۾ شديد کوٽ درپيش آهي، ترجمان چيو ته تازي عسڪري سرگرمين کان اڳ سوڊان ۾ انساني ضرورتن ۾ رڪارڊ اضافو رپورٽ ٿيو هو. تقريبن 15.8 ملين ماڻهن کي بنيادي شيون گهربل هيون. اهو تعداد ملڪ جي ٽيون حصو جي آبادي جي برابر آهي.
