اسلام آباد – 26 فيبروري (اي پي پي) اطلاعات ۽ نشريات واري وفاقي سيڪريٽري سردار احمد نواز سکيرا چيو آهي ته فلم پاليسي لاڳو ٿيڻ سان سئنيما گهرن جون رونقون بحال ٿينديون، فلم ۽ ڪلچرل پاليسي ۽ سي پيڪ ڪاروان هڪ ئي سلسلي جي ڪڙي آهن، اسان کي پنهنجي ثقافت دنيا آڏو پيش ڪرڻي آهي، اطلاعات ۽ نشريات واري مملڪتي وزير مريم اورنگزيب جي ايجنڊا ۾ ثقافتي پاليسي اولين ترجيح هئي جنهن تي اطلاعات ۽ نشريات واري وزارت تمام گهڻي محنت ڪئي ۽ ڌرين جي مشاورت ۽ تجويزن سان فلم ۽ ڪلچرل پاليسي آندي پئي وڃي. هو پاڪستان نيشنل ڪائونسل آف دي آرٽس (پي اين سي اي) ۾ سي پيڪ ڪاروان ۽ قومي آرٽس ڪنوينشن جي پڄاڻي واري تقريب کي خطاب ڪري رهيو هو.
