اسلام آباد۔23اگست (اے پی پی):وزیراعظم شہبازشریف سیلاب متاثرین دی امداد ککیتے اپیل کریندے ہوئیں آکھیے جو بلوچستان اتے سندھ اچ قیامت صغرٰی دا منظر اے، حکومت سیلاب زدگان دی مدد اتے بحالی کیتے ݙینھ رات کم کریندی پئی اے ، متاثرین کیتے کھرباں روپے دی لوڑھ اے ، قوم مصیبت اچ پتھے بھراویں دی مدد کیتے دل کھول تے عطیے ݙیوے ، وزیراعظم محمدشہباز شریف قوم توں سیلاب زدگان دی مدد کیتے امداد دی اپیل کیتی۔ اپݨے پیغام اچ وزیراعظم آکھیے جو ملک اچ مینھ دا 30 سال دا ریکارڈ ترٹݨ توں خاص طور تے بلوچستان اتے سندھ اچ تباہی وبربادی توں قیامت صغرٰی دا منظر اے۔ سینکڑاں پاکستانی سیلاب دی بے رحم موجاں دی نذر تھی تے آپݨے پھچوں جدائی دا غم چھوڑ ڳئن۔ سینکڑاں زخمیاں دی صحت یابی دی دعا کریندوں ، وݙی تعداد اچ لوک بے گھر ہن ، مال ڈھور، فصلاں ، باغ تے املاک کوں ضیان پڄے ۔ صوبائی حکومتاں ، وفاقی وصوبائی اداریں تے مسلح افواج دے بھرپور تعاون نال اساں سارے رل تے ݙینھ رات کم کریندے پیوں ۔ مجموعی طور تے 37.2 ارب روپے سیلاب زدگان کیتے ݙتے ویندے پئن ۔ میں وختی 5 ارب روپے دی رقم این ڈی ایم اے کوں جاری کروائی اے تاں جو ریسکیو، ریلیف اتے بحالی دے اقدامات تکھے تھیون ۔ ہر جاں بحق بندے دے خاندان کوں 10 لکھ ، زخمیاں ، گھراں دے ڈھݨ تے ٻئے ضیان تے زرتلافی توں علاوہ متاثرین کوں 25 ہزار روپے نقد دی ادائیگی وݙے پیمانے تے جاری اے جیں کیتے 80 ارب روپے توں ودھ درکار ہن ۔ کھرباں روپے دے ضیان کون پورا کرݨ تے متاثرین دی بحالی کیتے کھرباں دی لوڑھ اے اے سارے اقدامات ساݙا فرض اے جیں کوں اساں محنت، دیانتداری دے جذبے نال کم کریندے پیوں۔ سڑکاں تےپُل وھہہ ونڄݨ تں زمینی رابطہ کٹݨ تے ہیلی کاپٹراں توں مدد ڳھدی ویندی پئی اے ۔ اہل وطن دی مدد دیاں کوششاں دے دوران پاک آرمی دے افسران شہادت پیندے ہوئیں قربانی دے عظیم جذبے دی روشن مثال قائم کیتی اے ۔2005دے قیامت خیز زلزلے تے 2010دے تباہ کن سیلاب دے موقع تے وی عوام تے ادارے مصیبت اچ پتھے پاکستانیاں کیتے ایثاراتے قربانی دے ایجھے ہی عظیم جذبے توں دنیا اچ مثال بݨ ڳئے ہن ۔ پوری قوم اڳوں ودھ تے ہتھ ونڈاوے تے اساں کئی گنا زیادہ رفتار نال متاثرین دی وختی امداد تے بحالی اچ کامیاب تھی سڳدوں ۔ ایثاراتے قربانی اچ ساݙی قوم دنیا اچ ساریں توں اڳوں اے ، میں تساں کنوں تعاون دی درخواست کرینداں ۔ آقا کریم صلی اللہ علیہ وسلم توں ودھ تے ساݙے کیتے کوئی وی مثال نی تھی سڳدی جنہاں دی محبت اچ انصار مصیبت زدہ بھراویں دے ݙکھ ونڈیے ہن ۔ سیلاب زدگان دی مدد کیتے قائم فنڈ اچ دل کھول تےعطیات جمع کراؤ ۔ آئو ! مصیبت اچ پتھے بھراویں دی انصار مدینہ وانڳوں مدد کروں۔ تاں جو محشر دی اوکھی گھڑی اچ اللہ تعالی اساں تے رحم فرماوے ۔
