اسلام آباد۔14نومبر (اے پی پی) نگراں وزیراعظم انوار الحق کاکڑ اوور سیز پاکستانیاں کوں آپݨی رقم روشن ڈیجیٹل پاکستان اکاؤنٹ دے ذریعے منتقل کرݨ دی ترغیب ݙیندے ہوئیں آکھیے جو ترسیلات زر دی قانونی تے محفوظ ذریعے نال منتقلی ملکی ترقی کیتے اہم اے، اوورسیز پاکستانیز پاکستان اچ سرمایہ کاری کرن، حکومت انہاں دی ہرممکن مدد اتے سہولت ݙیسی ۔ منگل کوں وزیراعظم آفس دے میڈیا ونگ توں جاری بیان موجب نگراں وزیراعظم انوار الحق کاکڑ نال نعمان مصطفیٰ دی سر براہی اچ اوورسیز پاکستانیز دے وفد ملاقات کیتی۔ ایں موقع تے ڳالھ کریندے ہوئیں وزیراعظم آکھیے ٻاہرلے ملک رہݨ آلے پاکستانی ساݙا قیمتی اثاثہ ہن ، ملکی معیشت اچ اوورسیز پاکستانیاں دا کلیدی کرداراے ۔ انہاں آکھیے ٻاہرلے ملک رہݨ آلے پاکستانیاں دی ترسیلات زر دی قانونی اتے محفوظ ذریعے نال منتقلی ملکی ترقی سانڳے اہم اے، روشن ڈیجیٹل پاکستان اکاؤنٹ رقم دی منتقلی دا محفوظ ذریعہ اے جیں دے استعمال نال ملکی معیشت دی بہتری اچ کردار ادا کیتا ونڄ سڳدے۔ انہاں آکھیے جو اوورسیز پاکستانیز پاکستان اچ سرمایہ کاری کرن ، اوورسیز پاکستانیز دی سرمایہ کاری اتے انہاں دیاں جائیداداں دی حفاظت حکومتی ذمہ واری اے ایں سلسلے اچ وسلائی دی گنجائش کائنی، اوورسیز پاکستانیاں دے حقوق دا تحفظ حکومت دی اولین ترجیحات اچ شامل اے۔
