وزیراعظم دا مہینہ 200 یونٹس بجلی استعمال کرݨ آلے ڈھائی کروڑ  گھریلو صارفین سانڳے 50 ارب روپے ریلیف دا اعلان، وزیراعظم محمد شہباز شریف دا توانائی دے شعبہ اچ اصلاحات تے تقریب توں خطاب

اسلام آباد۔9جولائی(اے پی پی) وزیراعظم محمد شہباز شریف 200 یونٹس تئیں مہینہ بجلی استعمال کرݨ آلے گھریلو صارفین سانڳے50 ارب روپے ریلیف دا اعلان کریندے آکھیے وفاقی حکومت دے فیصلے توں ڈھائی کروڑ گھریلو صارفین کوں جولائی، اگست تے ستمبر اچ چار روپے توں ست روپے فی یونٹ فیدہ تھیسی ، کراچی بندرگاہ تے برآمدات تےدرآمدات دی مد اچ 1200 ارب روپے دی کرپشن تھیندی پئی اے ، بلوچستان اچ ٹیوب ویلاں کوں شمسی توانائی تے منتقل کرݨ نال قومی خزانے کوں سالانہ 80 توں 90 ارب روپے دی بچت تھیسی ، بلوچستان دی طرز تے پورے ملک اچ تیل تے چلݨ آلے 10 لکھ ٹیوب ویلاں کوں وی شمسی توانائی تے منتقل کیتا ویسی ، بجٹ اچ یقیناً ٹیکس لڳن مگر امیر تے اشرافیہ کوں وی ٹیکس دے دائرے اچ گھن آیا ڳئے ۔ رئیل اسٹیٹ دے شعبہ تے ٹیکس نال 100 ارب روپے دی آمدن متوقع اے، ڈاؤن سائزنگ اتے سرکاری خرچے گھٹاوݨ دے اقدامات دی نگرانی خود کریندا پیاں ، آئی ایم ایف نال پروگرام ساݙی لوڑھ تے مجبوری ہئی ،ویلھا آڳئے اشرافیہ اتے صاحب حیثیت لوک وی ملک سانڳے قربانی ݙیون  انشاءاللہ حالات بدلسن، بہتری آسی تے پاکستان اپݨا وںڄا مقام ول گھن آسی۔ اے ڳالھ انہاں توانائی دے شعبہ اچ اصلاحات دے حوالے نال تقریب توں خطاب اچ آکھی اے ۔ ایں موقع تے وفاقی وزراء اتے ارکان پارلیمنٹ وی موجود ہن ۔ وزیراعظم آکھیے بجٹ اجلاس اچ بھرپور شرکت تے ارکان پارلیمنٹ دا مشکور ہاں، پچھلے دور 23۔2022 اچ میاں نواز شریف دی قیادت اچ  اتے اتحادی جماعتاں دے سارے سربراہواں نال رل تے اساں ریاست کوں بچایا اتے سیاست کوں داؤ تے لاتا ،اللہ سئیں دا لکھ لکھ شکراے پاکستان دیوالیہ تھیوݨ توں بچ ڳئے ۔وزیراعظم آکھیے تساں ݙٹھے ماضی اچ سیاست چمکاوݨ سانڳے کیوں وݙے وݙے ٻول ٻولیے ڳئے تے وعدے کیتے ڳئے،  پی ٹی آئی 90 ݙینھ اچ بدعنوانی مکاوݨ دا اعلان کیتا لیکن ایندے برعکس کرپشن دے نویں ریکارڈ بݨائے ، کھنڈ تے کݨک کوں پہلے برآمد کیتا ول بعد اچ مہانگی درآمد کیتی تے سنڳتیاں دیے کھیسے بھریے ڳئے ، ملک دے لٹیے ڳئے 300 ارب  ڈالر واپس گھن آوݨ دیاں ڳالھیں کیتیاں لیکن ھک ݙھیلا وی واپس نی آیا ، پی ٹی آئی دی حکومت اپݨی سیاست دی خاطر ملک کوں داؤ تے لاتا مگر برطانیہ دے ادارے نیشنل کرائم ایجنسی دی مہربانی نال پاکستان دے خزانے اچ 190 ملین پاؤنڈ بھجوائے ڳئے تاں جو اے رقم قومی خزانے اچ جمع تھیوے لیکن کیویں ہیرا پھیری نال 190 ملین پاؤنڈ تے وی ہتھ صاف کیتے ڳئن تے قومی خزانے اچ اے رقم جمع کراوݨ دی بجائے ایندے اچ خوردبرد کیتی ڳئی۔ وزیراعظم آکھیے اساں نواز شریف دی قیادت اچ عوامی خدمت دا ٻیڑا چاتا تے کہیں حوالے نال غلط بیانی نال کم نی ڳھدا۔ ملک کوں وݙے چیلنج دا سامݨا اے ، مخلوط حکومت انھاں اوکھ تے چیلنج دا مقابلہ کریندی پئی اے ،ماضی اچ وݙے وݙے ٻول ٻولیے ڳئن لیکن حقیقت اچ کجھ وی نی تھیا۔ بانی پی ٹی آئی آکھیے مرویساں آئی ایم ایف کنے نہ ویساں لیکن ول آئی ایم ایف کنے ڳئے تے مہانگا پروگرام ڳھداتے ول ایں پروگرام کوں سیاست دی نذر کرݙتا ، جݙاں دنیا اچ تیل دیاں قیمتاں آسمان نال ڳالھیں کریندیاں پیاں ہن تاں عدم اعتماد دے ووٹ دے ݙر پاروں قیمتاں گھٹا ݙتیاں حالانکہ بجٹ اچ ایندی کوئی گنجائش وی نہ ہئی جیں توں قومی خزانے دا ضیان تھیا۔ وزیراعظم آکھیے نواز شریف ہمیشہ دلوں قوم دی خدمت کیتی ،انھاں دے وژن اتے پالیسی تے اساں عمل کریندے پیوں ۔ وزیراعظم آکھیے کل کوئٹہ اچ بلوچستان حکومت نال ٹیوب ویلاں کوں شمسی توانائی تے منتقل کرݨ دا معاہدہ کیتا، اے ھک تاریخ ساز اقدام اے  جیں توں قومی خزانے کوں 80 توں 90 ارب روپے دی سالانہ بچت تھیسی، بلوچستان اچ 28 ہزار دے نیڑے کنکشن کساناں دے ہن او بجلی استعمال کریندے پئے ہن لیکن ٻل نہ ݙے سڳدے ہن تے سالانہ 80 توں 90 ارب روپے وفاق کوں ضیان تھیندا پیا ہئی پچھلے اٹھ ݙاہ سال اچ قومی خزانے دے 500 ارب روپے وہا ݙتے ڳئے ،ایہو پیسہ  جے سڑکاں ،یونیورسٹیاں تےعوام دی خوشحالی تے لڳدا تاں کتنا فیدہ تھیندا ۔ وزیراعظم آکھیے وفاقی تے بلوچستان حکومت رل تے انہاں 28 ہزار ٹیوب ویلاں کوں شمسی توانائی تے منتقل کرݨ دا مںصوبہ بݨائے جیں تے 55 ارب روپے خرچ تھیسن ، منصوبے دی لاڳت دا 70 فیصد وفاق تے 30 فیصد صوبائی حکومت برداشت کریسی ۔ شمسی توانائی توں سستی بجلی بݨسی تے ایندی لاڳت وی گھٹ ویسی ۔ انہاں آکھیے ایہو ماڈل اساں ملک دے ٻئے صوبیں اچ وی لیسوں، پاکستان ماچ 10 لکھ ٹیوب ویل تیل نال چلدن تے تیل دا درآمدی ٻل ساڈھے ترائے ارب ڈالر سالانہ اے  جیڑھا قومی خزانے تے وݙا ٻوجھ اے اساں کنے زر مبادلہ دے ذخیرے محدود ہن اساں ݙو ترائے مہینے اچ فیصلہ کیتا جو تیل تے چلݨ آلے 10 لکھ ٹیوب ویلاں سانڳے بزنس ماڈل بݨایا ویسی کساناں کوں اساں قرضے گھن ݙیسوں تے بزنس ماڈل بݨا تے10 لکھ ٹیوب ویلاں کوں شمسی توانائی تے منتقل کیتا ویسی ۔ وزیراعظم آکھیے اساں کنے سنجھ دی ٻہوں روشنی اے ایندے توں فیدہ چاوݨ دی لوڑھ اے بجٹ اچ کجھ نویں شعبیں کوں ٹیکس دے دائرے اچ گھن آیا ڳئے ، تنخواہ دار طبقے تے وی ٹیکس لڳیے ، رئیل اسٹیٹ دے شعبے تے وی ٹیکس پاروں 100 ارب روپے دی آمدݨ تھیسی، بجٹ اچ یقیناً ٹیکس لڳن مگر امیر تے اشرافیہ کوں وی ٹیکس دے دائرے اچ گھن آیا ڳئے انہاں آکھیے بجلی دے نرخان دی وی ری بیسنگ تھئی اے، پروٹیکٹڈ صارفین دے وی نرخ ودھ ڳئن،پروٹیکٹڈ صارفین دے بجلی دے نرخاں اچ ودھارے دا پتہ اے ڈھائی کروڑ گھریلو صارفین جیڑھے 94 فیصد بݨدن ، میݙے اعلان توں فیدہ چیسن ، 200 یونٹ مہینہ بجلی استعمال کرݨ آلے گھریلو صارفین کوں ترائے مہینے جولائی، اگست اتے ستمبر سانڳے رعایت ݙتی ویندی پئی اے ، اکتوبر اچ موسم چنڳاں تھی ویندے تے بجلی دا استعمال گھٹ ویندے۔ انہاں ترائے مہینے اچ ڈھائی کروڑ صارفین کوں 50 ارب روپے دا ریلیف ݙتا ویسی تے انہاں اچ کے۔الیکٹرک دے صارفین وی شامل ہوسن ۔ انہاں آکھیے اے 50 ارب روپے اساں ترقیاتی فنڈز توں کڈھ تے ݙیسوں ،ماضی وانڳوں وعدہ کرتے کہیں کوں دھوکہ نی ݙتا، عام آدمی دا وی خیال رکھیے تے جنہاں نال اساں معاہدہ کرتے اڳوں ودھݨا اے انہاں کوں وی پوری طرح اعتماد اچ ڳھدا ڳئے ݙھائی کروڑ صارفین کوں چار روپے توں ست روپے فی یونٹ فیدی تھیسی ۔وزیراعظم آکھیے آئی ایم ایف نال پروگرام ساݙی لوڑھ تے مجبوری ہئی میکوں یقین اے جے اساں ایمانداری ،خلوص دل ،قربانی اتے ایثار نال ݙینھ رات محنت کیتی ،اشرافیہ تے صاحب حیثیت لوک جنہاں پاکستان توں ڈھڳ فیدے ڳھدن او پاکستان دے 25 کروڑ عوام کوں او فیدہ واپس کریسن ، ویلھا آڳئے اشرافیہ ملک سانڳے قربانی ݙیوے۔ وزیراعظم آکھیے حکومت صنعت اتے زراعت کوں چلاوݨ سانڳے صوبیں نال رل تے کم کریسی ،ڈاؤن سائزنگ دا کم شروع تھی چکے اساں بچت کریسوں ڈاؤن سائزنگ تے سرکاری خرچے گھٹاوݨ دے اقدامات دی نگرانی خود کرینداں پیاں ، ایف بی آر دی 100 فیصد ڈیجیٹائزیشن تھیندی پئی اے۔ وزیراعظم آکھیے پاکستان اچ درآمدات تے برآمدات تے  سالانہ پنج ارب ڈالر دا بحری جہازاں دا کرایہ خرچ تھیندے، پاکستان نیشنل شپنگ کارپوریشن کنے صرف 12 بحری جہاز ہن تے سالانہ تنخواہیں  پنج ارب روپے ہن ، پاکستان دی نسبت خطے دے ٻئے ملکاں کنے سامان دی نقل و حمل سانڳے کئی گنا زیادہ بحری جہاز ہن، بنگلہ دیش کنے وی کئی سو جہاز ہن انہاں آکھیے بدقسمتی نال ملک کوں چنڈ چنڈ اچ چٹیا ویندا پئے۔اساں ایندا علاج کرݨا اے ۔ وزیراعظم آکھیے ارباں ،کھرباں روپے دی کرپشن تے قابو پاوݨ دی لوڑھ اے تاں جو عام آدمی کوں ریلیف ملے تے ملک خوشحال تھیوے اساں کشکول بھنݨا اے،قرضیں توں جند چھڑاوݨی اے تاں ݙینھ رات محنت کرݨی ہوسی ، ریلیف دا ھکو طریقے اے رقم کرپشن دی نذر تھیندی پئی اے ایندا سدباب کیتا ونڄے وزیراعظم آکھیے مقتدر ادارے اساکوں ݙسائے صرف کراچی دی بندرگاہ تے ڈیوٹیز دی مد اچ سالانہ 1200 ارب روپے دی چوری تھیندی پئی اے جݙاں جو 2700 ارب روپے دے کلیمز ٹربیونلز تے اعلیٰ عدالتاں اچ کئی سالاں توں زیرسماعت ہن۔  وزیراعظم آکھیے وعدہ کرینداں اپݨی جان لڑا ݙیسوں تے ملکی ترقی سانڳے کوئی کسر نہ چھوڑیسوں تے ملک کوں اوکھ توں نجات ݙویسوں ۔وزیراعظم آکھیے ملک اچ معدنیات تے آئی  ٹی سودھے مختلف شعبیں اچ ترقی دی وݙی گنجائش اے،بد قسمتی اے اساں انہاں وسائل توں فیدہ نی چا سڳیےحالی وی دیر نی تھئی ،اڄ وی فیصلہ کر گھنوں کوئی اوکھ رستے دی رکاوٹ نہ بݨسی ۔ کرپشن دے وݙے وݙے سوراخ بند کریسوں، قوم دے ارباں ، کھرباں واپس گھن آسوں تے ایمانداری اتے دیانتداری نال انہاں کوں خرچ کریسوں تاں اے ھک عظیم قوم بݨ ویسی، انشاءاللہ حالات بدلسن ، بہتری آسی تے پاکستان اپݨِا ونڄا مقام ول گھن آسی