راولپنڈی۔25اکتوبر(اے پی پی)پاک فوج دے شعبہ تعلقات عامہ ( آئی ایس پی آر) دے ڈائریکٹر جنرل (ڈی جی) لیفٹیننٹ جنرل بابر افتخار سینئر صحافی ارشد شریف دے قتل تے ولدا ݙیندے آکھیے جو تحقیقات تھیوݨی چاہیدی اے جو ارشد شریف کوں کئیں ملک توں ونڄݨ تے مجبور کیتے؟ قتل دے ازلام تراشی دی مکمل تحقیقات تھیوݨیاں چاہیدن۔ نجی ٹی وی نال الیندے ترجمان پاک فوج آکھیا جو جی ایچ کیو حکومت کوں آکھیے جو ایں افسوسناک واقعے دی مکمل تحقیقات کرائی ونڄے اتے ایندے عوامل تے محرکات کوں پورا ݙٹھا ونڄے۔ ڈی جی آئی ایس پی آر آکھیے جو کینیا دی حکومت اتے پولیس منیے جو اے واقعہ ہک غلطی پاروں تھئے ٻھل ضروری اے جو ایندی اعلیٰ سطح تے مکمل تحقیقات تھیون، انہاں حالات تے کئی سال ابھرین، جیندے تے ساݙا خیال اے جو ایندی وݙی اعلیٰ سطح دی انکوائری تھیوݨی چاہیدی اے جو حقائق سامݨے آون۔ انہاں آکھیا جو انہاں آکھیا جو واقعے دی بنیاد تے قیاس آرائیاں، کوڑی الزام تراشی کوں بند تھیوݨا چاہیدے اتے عوامل ݙیکھݨ کیتے مکمل تفتیش تے تحقیق تھیوے جو ایندا ولدا مل سڳے۔ اے ݙیکھݨاچاہیدے جو ارشد شریف کوں پاکستان توں کیوں ونڄݨا پئے، کئیں ونڄݨ تے مجبور کیتے اتے او کتھاں کتھاں رہین؟ ایں واقعہ دے تھیوݨ تئیں دے کیا حالات ہن، اے سب کڄھ کیویں تھئے جو انہاں مراحل اچ بدقسمتی نال ولا ولا کوئی نہ کوئی جواز ٻݨا تے الزام تراشی شروع کیتی ویندی اے اتے ادارے تے انگل چاتی ویندی اے، انہاں افواہیں کوں مکݨا چاہیدے۔ انہاں آکھیا جو اساں حکومت کوں درخواست کیتی اے جو بغیر وجہ الزام تراشی کرݨ آلیاں دے خلاف وی قانونی کارروائی کیتی ونڄے۔ انہاں آکھیا جو ساکوں ارشد شریف دی فوتڳی تے افسوس اتے ݙکھ اے، او ہک پروفیشنل صحافی ہن جیندا تفتیشی رپورٹنگ اچ نویکلا مقام ہا، ساݙے کئی آپریشنز اچ او ودھ تے فیلڈ رپورٹنگ کریندے رہین، انہاں دے پروگرام ٹیکسٹ بک جرنلزم دی مثال دے طور تے یاد رکھیے ویسن۔ لیفٹیننٹ جنرل بابر افتخار آکھیا جو ݙیکھݨا اے ہے جو ایں افسوس ناک واقعے دی بنیاد تے کون فیدہ چیندا پئے، جیندے کیتے اے مہم چلائی ویندی پئی اے، ایکوں ہݨ مکݨا چاہیدے۔
