کالام ۔31اگست (اے پی پی):وزیراعظم شہبازشریف خیبرپختونخوا اچ سیلاب توں متاثرہ لوکاں کیتے 25 ہزار روپے فی کس دی فراہمی دی مد اچ وفاق دی طرفوں 10 ارب روپے دااعلان کریندے ہوئیں آکھیے جواتحادی حکومت چھیکڑی متاثرہ بندے دی بحالی تئیں آپݨیاں کوششاں جاری رکھیسی ، آئی ایم ایف پروگرام دی بحالی توں ملک ڈیفالٹ تھیوݨ دے خطرے توں نکل ڳئے ، اللہ کرے جو پاکستان کیتے آئی ایم ایف دا اے آخری پروگرام ہووے، اساں پاکستان کوں دنیا اچ ایندا ونڄا ہویا مقام واپس ݙیواوݨ کیتے کوشاں ہن،اللہ تعالیٰ پاکستان کوں انسانی تے قدرتی وسائل نال نوازیے، انہاں علاقیں اچ پتھے سارے سیاحواں کوں خمیس تئیں کڈھ گھنسوں ۔ وزیراعظم شہباز شریف خیبر پختونخوا اچ سیلاب توں متاثرہ علاقیں اچ کالام تے سوات دا دورہ کیتا۔وزیر اعظم سیلاب متاثرین نال ڳالھ وی کیتی ۔ ایں موقع تے انجینئر امیر مقام ، ڈپٹی سپیکر زاہد اکرم درانی ، نجم الدین اتے ٻئے وی موجود ہن ۔میڈیا نال ڳالھ مہاڑ کریندے ہوئیں وزیراعظم آکھیے جو اڄ میں خیبر پختونخوا دے دورے تے آیاں لوکاں نال ملیاں۔انہاں دے نال ڳالھ وی کیتی اے ، اتھاں سنٹر اچ تریمتاں ،ٻالاں سودھے سیاح وی موجود ہن انہاں کوں انہاں دے گھراں تئیں پڄا ݙیسوں ،افواج پاکستان دے ہیلی کاپٹر انہاں کوں کڈھیندے پئن ، اتھاں پتھے سارے سیاحواں کوں کڈھیسوں ،مدین،بحرین کالام دریا اچ پاݨی چڑھݨ پاروں تباہی تھئی اے ،کوئی شک کائنی جو اے قدرتی آفت ضرور ہئی لیکن ناقص انسانی منصوبہ بندی دی وجہ توں اے ضیان’’مین میڈ‘‘ اے۔ہوٹل دریاواں اچ اتے پاݨی اچ غلط طور تے بݨائے ڳئے ۔ھک لہذے اچ اے سارے ڈھہہ ڳئن ،گھراں کوں ضیان تھئے ،پل سڑکاں متاثر تھئن۔انہاں آکھیے جو حکومت پاکستان صوبائی حکومت ،مسلح افواج پاکستان،این ڈی ایم اے، منتخب نمائندے،انتظامیہ اتے پی ڈی ایم اے نال رل تے ݙینھ رات محنت کریندے پئن ، اتھوں سیاحواں دے انخلا دا عمل ݙینھ رات جاری اے ایں تے آرمی چیف اتے ائیر چیف دے شکر گزار ہیسے۔ݙسایا ڳئے جو خمیس تئیں اتھاں پتھے سارے سیاحواں کوں کڈھ ڳھدا ویسی ، انہاں آکھیے اتھاں جیڑھی تباہی آئی اے اے دریا دے بپھرݨ پاروں آئی اے ۔انہاں آکھیے گزریل ݙینھ چیف آف آرمی سٹاف وی اتھاں دا دورہ کیتے ۔سندھ بلوچستان اچ مینھ پاروں تباہی تھئی ھک ہزار توں ودھ لوک جاں بحق تھئن ۔سارے میدانی علاقے سمندر دا منظر پیش کریندے پئن ،ہزاراں لوک زخمی ، لکھاں بے گھر تھئن ۔انفراسٹرکچر کوں ضیان تھئے 7 لکھ جانور پاݨی اچ وھہہ ڳئن ۔لکھاں ایکڑ زمین تے کھڑیاں فصلاں کوں ضیان پڄے ۔کھجیاں دے وݨ ،چاول کپاہ دی فصل تباہ تھئی ۔انہاں آکھیے لکھاں لوک کھلے آسمان تلے پناہ ڳھدی ہوئی اے۔پوری قوم دی کاوش نال انہاں کوں محفوظ جاہ تے پڄایا ڳئے ۔میں صوبائی حکومتاں،پاک فوج اتے اینڈی ایم و پی ڈی ایم کوں شاباش ݙینداں جو متاثرین دی بحالی کیتے ݙینھ رات کم کریندے پئن، انہاں آکھیے سڑکاں پل ترٹ ڳئن ،بجلی دا نظام درہم برہم تھئے۔ وزیر توانائی سندھ تے سیکرٹری بلوچستان وچ ہن ۔ایف ڈبلیو اتے این ایچ اے بھرپور انداز اچ فعال ہن۔انہاں آکھیے وفاقی حکومت 28 ارب روپے این ڈی ایم اے اتے بی آئی ایس پی دے ذریعے ݙیندی پئی اے ۔سندھ و بلوچستان اچ 25 ہزار روپے فی خاندان دے حساب نال تقسیم جاری اے۔سندھ15 ارب اتے بلوچستان کیتے 10 ارب روپے ݙتن،ضیان ایں توں ودھ اے ، مزید رقم ݙیسوں ، باقی صوبیں اچ وی رقم ݙیندے پیوں ۔جاں بحق تھیوݨ آلیں دے لواحقین کوں 10 لکھ روپے فی کس اتے زخمیاں کوں ترائے لکھ روپے ݙیندے پیوں ویں رقم نال ٹر ونڄݨ آلیں دے ضیان دا ازالہ تاں نی تھی سڳدا لیکن حکومت دا اے فرض اےتے اساں فرض نبھیندے پیوں ۔فصلاں دے ضیان دا جائزہ گھندے پیوں ، انہاں آکھیے ساڈھے 3 ہزار کلومیٹر توں ودھ سڑکاں تباہ تھئن اے ھک اوکھا مرحلہ اے ساݙے دوست بھرا ملک وی مدد کریندے پئن ،سربراہان مملکت اظہار یکجہتی کریندے پئن انہاں ہر طرح دی مدد دا یقین ݙیوائے۔ترکی، متحدہ عرب امارات توں امدادی سامان آندا پئے ، ترکی توں امدادی سامان گھن تے ریل ڳاݙی آندی پئی اے ۔ امدادی سامان دی این ڈی ایم اے اتے پی ڈی ایم اے دے ذریعے ونڈیا ویندا پئے ۔انہاں آکھیے جو متحدہ عرب امارات توں 50 ملین ڈالر مالیت دے سامان دی پہلی کھیپ دے طور تے ݙتا ویندا پئے ۔امریکا 30 ملین ڈالر امداد دا اعلان کیتے ۔ ۔متاثرین کیتے ملݨ آلی امداد امین بݨ تے متاثرین تئیں پڄیسوں ، انہاں آکھیے اقوام متحدہ دے سیکرٹری جنرل دے شکر گزار ہیسے،جنہاں وزارت خارجہ دی اپیل تے 160 ملین ڈالر دا پروگرام بݨائے ۔عالمی ادارے،ڈونرز وی اپݨا حصہ پیسن ، انہاں کوں یقین ݙیوائے جو اے پیسہ شفاف انداز اچ مستحقین تئیں پڄیسوں ، انہاں آکھیے پورا یقین اے جو اتحادی حکومت،صوبائی حکومت،افواج پاکستان این ڈی ایم اے اتے پی ڈی ایم اے رل تے ݙکھی لوکاں کوں آپݨے گھراں اچ آباد کریسن ۔ایندے توں پہلے وزیراعظم شہباز شریف خیبر پختونخوا اچ سیلاب توں متاثرہ علاقیں کالام تے سوات دا دورہ کیتے ۔وزیراعظم سیلاب متاثرین نال ڳالھ مہاڑ وی کیتی انہاں آکھیے جو امدادی کماں دی نگرانی وی خودکریساں ۔کانجو اچ پاک فوج اتے این ڈی ایم اے دی طرفوں وزیر اعظم کوں ݙسایا ڳیا جو اپر سوات کالام اچ فتح پور توں بحرین تئیں 18 کلومیٹرسڑک کوں ضیان پڄے ،59 ہوٹل تباہ تھئن جݙاں جو 20 توں 25 ہوٹل جزوی متاثر تھئن۔کمراٹ توں 500 توں 700 سیاح جݙاں جو کالام توں 1400 توں 1500 سیاحواں کوں کڈھیا ڳئے ۔مٹلٹان اچ ہائیڈرو پاور پراجیکٹ تے کم کرݨ آلے 150 مزدوراں کوں کڈھیا ڳئے ۔ متاثرین کوں خوراک ݙتی ڳئی اے۔ایں علاقے وچ 22 لوک جاں بحق 15 زخمی تھئن ۔ݙاہ پل تباہ تھئن ،165 گھر مکمل تباہ اتے 230 جزوی تباہ تھئن۔مٹہ،بحرین اتے شانگلہ اچ 15 سڑکاں متاثر تھئن ۔وزیراعظم کوں ݙسایا ڳئے وج کانجو اچ سیلاب توں 22 بندے جاں بحق تھئن ۔ وزیراعظم جرمنی توں آئے سیاح خاندان نال وی ملیے انہاں کوں ݙسیا ڳئے جو 600 توں 700 سیاح حالی وی موجود ہن جنہاں کوں کل تئیں کڈھ ڳھدا ویسی ۔وزیر اعظم سیاحواں نال ملاقات وی کیتی۔انہاں کوں ݙتیاں ونڄݨ آلیاں سہولتاں دا جائزہ ڳھدا ، انہاں کوں ݙسایا ڳئے جو باری مشینری نال بحالی دا کم جاری اے ، ساݙی پہلی ترجیح سڑکاں دی بحالی اے۔ وزیر اعظم کوں ݙسایا ڳئے جو مدین، بحرین، سیدو شریف اتے کالام اچ کئی پل تے سڑکاں تباہ تھئن ۔وزیر اعظم این ایچ اے کوں ہدایت کیتی جو سڑکاں کوں وختی بحال کیتا ونجے۔کالام اچ پتھے سیاحواں کوں جلدی کڈھیا ونڄے ۔وزیر اعظم ہنگامی بنیاداں تے سڑکاں دی بحالی دا کم ایف ڈبلیو او دے حوالے کرݙتا۔اتھاں پتھے سیاحواں کوں کڈھݨ کیتے وختی ہیلی کاپٹر ݙیوا ݙتا ۔
