اسلام آباد۔28دسمبر(اے پی پی):نگران وزیراعظم انوارالحق کاکڑ فلسطین دی وݙی چنتے آلی صورتحال سانڳے مظلوم فلسطینیاں نال یکجہتی کیتے حکومت پاکستان ولوں نویں سال دے موقع تے کہیں وی قسم دیاں تقریباں تے پابندی دا اعلان کریندے لوکاں کوں اپیل کیتی اے جو او غزہ دے مظلوم عوام نال یکجہتی کرن اتے نویں سال تے سادگی ݙکھاون۔ ہک سنیہے اچ نگران وزیراعظم انوارالحق کاکڑ آکھیے جو سال 2024 آندا پئے، میں دعا کرینداں جو نویں سال دا سڄھ ساݙے ملک پاکستان اتے پورے ڄڳ کیتے خوشحالی، امن اتے محبتے دا سنیہا ڳھن تے آوے۔ انہاں آکھیا جو فلسطین اچ قابض اسرائیلی افواج معصوم شہریاں تے خاص کر معصوم ٻالاں تے وݙے ظلم سٹیندی پئی اے، قتل عام اتے نسل کشی تے پوری پاکستانی قوم اتے امت مسلمہ ݙکھی اے، ہزاراں فلسطینی شہید تھی چکین، اسرائیلی خونریزی روکݨ کیتے پاکستان ڄڳ اچ ہر ڄاہ تے مظلوم فلسطینیاں کیتے آواز چاتی اے اتے چیندا وی رہسی، فلسطینیاں کیتے پاکستان تریڄھی امدادی سامان دی کھیپ تیکھے ٻھیڄی ویسی، پاکستان فلسطینی ٻھراواں دی امداد، غزہ توں زخمیاں کوں کݙھݨ اتے علاج کیتے مصر اتے اردن نال رابطے اچ اے۔
.jpg)
